За избор на Претседател во Собрание се залагам(е) 10 години и тоа не е предлог само на "албанските" партии

1. За посреден избор на претседател (во Собрание) се залагам(е) од 2013, а и од формирањето на Движењето за нова република тоа ни е дел од Програмската декларација.

Впрочем од 2013 предлагав(ме) и внесување во Преамбулата на припадниците на деловите од народите што пред пар години ги дефинира и "францускиот предлог".

Политиката не е дневно-партиско пазарење со функционалноста на државата.

Затоа, еве ги аргументите на темата што по изборите ќе биде актуелна - заедно со "францускиот предлог".

2. Посредниот избор на претседател е соодветен за споделената извршна власт во нашата парламентарна демократија. Особено што и покрај непосредниот избор, постојните овластувања одговараат на претседател избран од Собранието.

3. Актуелниот модел е избран по ликот на првиот претседател, Глигоров.

Но споредете, тој беше повлијателен во првиот мандат (избран во првото плурално Собрание со 2/3 мнозинство) отколку во вториот.

4. Површно е толкувањето дека посредниот избор на претседател ни е потребен само за одразување на мултиетничноста.

За илустрација, нациите на Албанија, Грција и Косово се над 90% етнички хомогени, а претседателите на нивните републики сепак се избираат во - парламент.

Моделот на избор и ингеренциите на претседателот е втемелен во преплетот на политичката и уставната историја на државата со односот на општеството кон парламентарната демократија.

5. Пристапот кон непосредниот избор на претседател ни се темели на две предрасуди форсирани од југо-скопската "јавност":

А) "Со конститутивноста на Македонците во сопствената држава оваа функција припаѓа на Македонец, а секое поинакво решение ги загрозува Македонците и унитарноста".

Исто се тврдеше и за функциите претседател на Собранието и премиер, а Македонците се исто Македонци и државата е исто унитарна и со немакедонец на чело на Владата и на чело на Собранието.

Б) "Непосредно избраниот претседател на Републиката може да тропне на маса".

Претседатели кои решаваа проблеми беа Глигоров и Трајковски - низ дијалог и низ институциите, а не со "тропање на масата".

Овие предрасуди служат за одржување на духот на авторитаризам и шовинизам во општеството.

Оти само низ тој дух југо-советските тајкуни кои имитираат олигархија - преку своите партии, медиуми и експерти можат да спречуваат функционални и демократски институции за владеење на правото - и борба со корупцијата.

За останатото на темата по изборите. И онака овие претседателски - се непосредни.