За нас

Спротивставувајќи се на концептот на корпоративно владеење со државата, ги согледуваме ризиците: по економијата, државните институции, општеството, но и по етничкиот идентитет на Македонците и националниот идентитет како целина на нацијата на Северна Македонија.

Принципиелно ги отфрливме и резултатите од изборите 2014 и флоскуларното „едно општество за сите". 2016 беше последната можност партиите какви што ги познава(в)ме да градат балансирана државна политика.

Новиот политички процес не се „шлепува" зад туѓ авторитет. Не цели кон враќање на процесите, туку кон следните. Оттука, не тргнуваме од веќе етаблиран правен ентитет... туку без претходни „чинови" и хипотеки. Со верба во идеја и автохтона политичка акција на сегашната генерација.

Бидејќи досегашната е веќе исцрпена, во политичка смисла, економски, образовно, медиумски... и во културно-историското доживување на себеси и својата околина. НОВА РЕПУБЛИКА е македонскиот политички наратив и акција во кои конститутивноста на македонскиот народ е промислен договор со припадниците на сите други народи. Унапредувањето на правата на сите ги „заштитува" сите од пасивно-агресивниот шовинизам.

За унапредување на односите со сите соседи, соочувајќи се со своите историски и општествени вистини - Потребна е НОВА РЕПУБЛИКА! Впрочем, една од мисиите на Северна Македонија е токму тоа - извозник на регионална стабилност како влог во континенталната безбедност во времиња на предизвици.