Политички приоритети на НОВА РЕПУБЛИКА за 2026 ГОДИНА

Документот „Политички приоритети на НоРа за 2026 година“ е донесен на Третата седница на Националниот одбор од 2 јануари 2026 во Скопје. Тој е составен од три дела: Состојби, Приоритетни решенија и Принципи.

За нацијата и секој граѓанин на Северна Македонија да живее во слобода, ред и просперитет мора да воспоставиме владеење на правото што значи почитување и на Уставот и законите и на Рамковниот договор и договорите со соседите.

За да владее правото мора да ги запреме злоупотребите на влијание и јавни финансии од политичките и финансиските „елити“.

За да ги запреме овие злоупотреби мора да го срушиме монополот над власта и економијата стекнат по идеолошка основа од неколку семејства и групации во минатото. Без тој монопол овие семејства и групации не можат да го задржуваат сегашниот лош поредок и да го попречуваат полноправното членство на Северна Македонија во ЕУ.

Изборот е или тие или сите ние. НОВА РЕПУБЛИКА не постои за нив. Оттука целината на решенијата се правните решенија за:

Уставни дополнувања за преговори и полноправно членство во ЕУ до 2030 година.

Ветинг во (право)судството, медиумите, партиите, безбедноста, дипломатијата, администрацијата, невладиниот сектор.

Отворање на досиејата на фунционерите и соработниците на југословенските служби во Северна Македонија. Со тоа се прекинува нивната (семејна, генерациска и групациска) поврзаност за контрола над економијата, финансиите и системот.

Проширена конфискација на криминално-стекнатиот имот за одземање на злоупотребените (јавни финансии) од сторителите, ним блиски и поврзани лица и ентитети.

Проширен опфат на рестриктивните мерки вклучувајќи ги оние од САД, Обединетото Кралство и Канада, заедно моментално утврдениот.

Уредување на работењето со криптовалути за спречување на перење пари, корупција и безбедносни закани.

Нов Кривичен Законик. Тој не е донесен две години за одржување на неказнивоста.

Прекинување на оданочувањето на семејните и инвестициските приливи од дијаспората. Државата пак ги казнува иселениците и нивните семејства со своите политики: еднаш иселувајќи ги за да преживеат и успеат, сега оданочувајќи ги затоа што помагаат.

Отворање за инвестициите од соседството, особено сојузниците во НАТО. Просперитетот зависи од претприемништвото, а не од наследените економски практики и правци.

НОВА РЕПУБЛИКА останува посветена на спроведување на преземените обврски во меѓународните односи и на граѓанската рамноправност, соодветната и правичната застапеност на заедниците вклучително потребните и расположливите антидискриминациски механизми како соствен елемент на владеењето на правото. Ова се решенијата за владеење на правото, успешен инвестициски циклус и подобар личен стандард и колективен систем. Ова се решенијата за слобода, ред и просперитет на граѓанинот во земјата и на нацијата интегрирана во Европската Унија.

Принципи на дејствување: НОВА РЕПУБЛИКА е самостојна национално-центристичка партија. За остварување на политичките цели и Програмската платформа. НоРа може да соработува со политички групации и граѓански иницијативи кои се согласни со приоритетните решенија. За таа цел, НОВА РЕПУБЛИКА може да биде и заедничка платформа на споменатите групации и иницијативи на основа на рамноправност, договор и соодветна застапеност.